Улуттук коопсуздук мамлекеттик комитети (УКМК) Россиянын Сахалин облусундагы Түштүк-Сахалинск шаарында Кыргызстандын жараны кармалганын билдирди.
Мекеменин маалыматына ылайык, 1993-жылы туулган З.у.К. аттуу жаранга карата Кылмыш-жаза кодексинин 278-беренеси ("Массалык башаламандыктар") боюнча кылмыш иши козголгон. Ал мамлекеттик жана мамлекеттер аралык издөөгө жарыяланган.
Тергөө маалыматы боюнча, шектүү чет өлкөдө жүрүп, Instagram социалдык тармагындагы баракчасы аркылуу массалык башаламандыктарды уюштурууга, ошондой эле бийликти күч менен кулатууга же басып алууга чакырыктарды камтыган билдирүүлөрдү байма-бай жарыялап турган.
УКМКнын маалыматына ылайык, жүргүзүлгөн ыкчам-издөө иш-чараларынын натыйжасында ал Россиянын аймагында кармалып, Кыргызстанга жеткирилген. Мекеме анын жоопкерчиликтен качуу үчүн социалдык тармактарда купуялуулук жөндөөлөрүн колдонуп, жалган жеке маалыматтарды пайдаланганын белгиледи.
Учурда кылмыш ишинин алкагында тергөө амалдары уланууда. Кармалган жаран УКМКнын тергөө абагына киргизилди.
УКМК социалдык тармактар аркылуу жалган же чагымчыл маалыматтарды таратуу мыйзамда каралган кылмыш жоопкерчилигине алып келерин эскертип, жарандарды текшерилбеген маалыматтарды жарыялабоого чакырды.
