Жогорку Кеңештин төрагасы Марлен Маматалиев парламенттин бүгүнкү жыйынында "75чилердин каты" боюнча пикирин билдирип, анын түпкү максаты мөөнөтүнөн мурда шайлоо өткөрүү болгонун айтты.
Анын айтымында, каттын артында саясий кырдаалды өзгөртүүгө багытталган аракеттер турган.
"Мындайча айтканда, чөөлөр талааны ээлегиси келген. Бирок алар арстанга кол салып жатканын унутуп коюшкан. Чөө арстанды жеңе албайт. Ал эми арстандын артында 7 миллион эл турат", — деди төрага.
Маматалиев ошондой эле Жогорку Кеңешке келген "75чилердин каты" атайын тапшырма менен даярдалып, жөнөтүлгөнүн белгиледи.
Белгилей кетсек, учурда "75чилердин каты" боюнча соттук териштирүүлөр жүрүп жатат. Иштин алкагында бир катар саясатчылар жана коомдук ишмерлер сурак берип, көрсөтмө берүүдө.
