.
Кыргызстанда Жогорку Кеңештин депутаттары оккульттук-мистикалык кызматтарды көрсөтүүгө, ошондой эле тиешелүү жогорку билими жок адамдардын психологиялык жардам көрсөтүүсүнө тыюу салууну сунуштаган мыйзам долбоорун демилгелешти. Документ коомдук талкууга чыгарылды.
Мыйзам долбоорун иштеп чыккандардын белгилешинче, учурда көзү ачык, бүбү-бакшыларды жана тиешелүү билими жок психологдорду жарнамалоого коюлган тыюу кардарларды тартуу жолдорун гана чектейт. Ал эми мындай кызматтарды көрсөтүү ишмердүүлүгүнүн өзүнө бөгөт койбойт.
Демилгечилердин максаты — эмоционалдык жактан аялуу абалда турган жарандарды коргоо жана мындай кызматтардын көрсөтүлүшүнө толук тыюу салуу.
Бул үчүн Кыргызстандын Укук бузуулар жөнүндө кодексине 405-1-жаңы беренени киргизүү сунушталууда.
Долбоорго ылайык, оккульттук-мистикалык кызматтарды көрсөткөн же жогорку билими тууралуу диплому жок туруп психологиялык консультация берген жеке жактарга биринчи жолу мыйзам бузганда 10 миң сом айып пул салынат. Мында кызмат акысыз көрсөтүлгөн күндө да айып пул каралган.
Ал эми мыйзам бузуу бир жыл ичинде кайталанса, системалуу түрдө интернет аркылуу иш жүргүзүлсө же кардарлар жалпыга маалымдоо каражаттары, социалдык тармактар жана мессенджерлер аркылуу тартылса, айып пулдун өлчөмү 20 миң сомду түзөт. Буга түз эфирлер, кардарлардын пикирлери жана жеке сунуштар аркылуу жарнамалоо да кирет.
