Кыргызстандын Улуттук коопсуздук мамлекеттик комитети Чүй облусунда диний экстремисттик идеологиянын жайылышына каршы күрөшүү жана аймактагы диний кырдаалды жакшыртуу багытында иш-чараларды өткөрдү.
Атайын кызматтын маалыматына ылайык, тыюу салынган "Якын-Инкар" диний кыймылынын 11 мүчөсү менен алдын алуу жана түшүндүрүү иштери жүргүзүлгөн.
Иш-чараларга Чүй облусунун казыятынын өкүлдөрү да катышкан. Натыйжада аталган агымдын тарапкерлери өздөрү карманган көз караштардын жаңылыш экенин моюнга алып, экстремисттик идеяларды айыпташкан. Ошондой эле алар Кыргызстандын мыйзамдарын жана жалпы адамзаттык баалуулуктарды сактоого даяр экендиктерин билдиришкен.
УКМК белгилегендей, өлкөнүн мусулмандар дин башкармалыгынын өкүлдөрү менен биргеликте калк арасында түшүндүрүү жана алдын алуу иштери туруктуу негизде жүргүзүлүп келет. Бул иш-чаралар жарандарды интернет мейкиндигинде тараган диний мазмундагы маалыматтарга сын көз караш менен мамиле кылууга, ошондой эле жалган убадаларга жана жаңылыш диний агымдарга алданбоого чакырууга багытталган.
Мекеме мамлекет ар бир жарандын дин тутуу эркиндигин урматтарын жана колдорун белгилеп, ошол эле учурда радикализмдин, экстремизмдин жана зомбулуктун бардык көрүнүштөрүнө мыйзам чегинде бөгөт коюларын эскертти.
