КР УКМК мамлекеттик органдар тарабынан бюджеттик каражаттарды мыйзамсыз пайдалануу, уурдоо жана максатсыз пайдалануу фактыларын аныктоо, алдын алуу жана ага каршы күрөшүү боюнча көрүлүп жаткан иш-чаралардын алкагында, Нарын облусунун Ат-Башы районунун Ат-Башы айыл аймагына жаңы атайын техникаларды сатып алууда мамлекетке 5 363 000 сом өлчөмүндө зыян келтирилгенин аныктады.
Тактап айтканда, 2025-жылдын апрель айында Ат-Башы айыл аймагында жаңы таштанды ташуучу унааны жана жаңы кран-манипуляторду сатып алуу боюнча тендер жарыялаганы аныкталган. Натыйжада, "В." ЖЧКсы жеңүүчү деп табылып, жалпысынан 10 863 000 сомго келишим түзүлгөн. Көрсөтүлгөн атайын жабдуулар "Ат-Башы Тазалык" муниципалдык ишканасынын балансына өткөрүлүп берилген.
Эксперттик баалоо боюнча, тендерден кийин жеткирилген таштанды ташуучу унаанын шасси номери өзгөртүлгөн, унаа 2019-жылдан берки тетиктер жана компоненттер менен жабдылган жана салону кайра сырдалган.
Көрүлгөн чаралардын натыйжасында аныкталган зыяндын орду толтурулуп, тендердин квалификациялык талаптарына жооп берген 5 миллион 363 миң сомдук 2025-жылы чыгарылган жаңы “DONGFENG” таштанды ташуучу унаасы алынып келинди.
