Бишкекте окуучулар жана бийлик өкүлдөрү балдардын укуктары жана мектеп көйгөйлөрү боюнча диалог өткөрүп, бир катар сунуштарды иштеп чыгышты.
2026-жылдын 27-апрелинде Бишкектеги «Тунгуч» залында мектеп окуучулары менен бийлик өкүлдөрүнүн катышуусунда интерактивдүү диалог өткөрүлдү. Иш-чара балдардын укуктарына байланышкан чечимдерге алардын катышуусун кеңейтүүгө багытталды.
Диалогду Президенттин Администрациясынын өкүлчүлүгү, Бишкек мэриясы жана коомдук уюмдар биргеликте уюштурду. Ага шаар мектептеринен 42 окуучу жана тиешелүү мамлекеттик органдардын өкүлдөрү катышты.
Иш-чарада окуучулар өз көйгөйлөрүн айтып, билим берүү жана мектеп жашоосун жакшыртуу боюнча сунуштарын беришти. Талкуу интерактивдүү форматта өтүп, топтук иш жана сунуштарды иштеп чыгуу ыкмалары колдонулду.
Жыйынтыгында катышуучулар эң маанилүү демилгелерди аныктап, аларды ишке ашыруу боюнча кийинки кадамдар белгиленди.
