Кыргызстанда 1-апрелден тарта медицина кызматкерлеринин эмгек акысы 100 пайызга жогорулайт. Бул тууралуу 20-мартта президенттин басма сөз катчысы Аскат Алагөзов билдирди.
Анын айтымында, мындай чечимди буга чейин өлкө башчысы Садыр Жапаров жарыялап, дарыгерлерди колдоо зарылдыгын белгилеген. Учурда тармактагы кадр тартыштыгын азайтуу жана жүктөмдү жеңилдетүү боюнча иштер жүргүзүлүүдө.
Жаңы шартка ылайык, жаш дарыгерлердин айлыгы 13 миң сомдон 35 миң сомго чейин өсөт. Тажрыйбалуу адистердин маянасы стажына жараша андан да жогору болот. Алыскы жана тоолуу аймактарда иштегендер үчүн айлык орточо 30 пайызга көбөйөт.
Мындан тышкары, “Дарыгердин депозити” программасынын алкагында кварталына 66 миң сомдон төлөнөт. Айрыкча талап кылынган адистиктерде иштеген жаш дарыгерлерге ай сайын кошумча 20 миң сом каралган.
Ошондой эле медайымдардын айлыгы да кескин өсүп, 8 миң сомдон 29 миң сомго чейин жогорулайт. Учурда өлкө боюнча 1500дөн ашык дарыгер жетишсиз экени белгиленип, бул тармакка адистер чакырылууда.
