Бишкек шаарында курулуш иштеринде коопсуздук эрежелерин сактабаган компания жоопкерчиликке тартылды. Бул тууралуу Курулуш, архитектура жана турак жай-коммуналдык чарба министрлиги билдирди.
Маалыматка ылайык, 19-март күнү министрликке Малдыбаев көчөсү, 269 дарегинде жайгашкан курулуш объектинде коопсуздук талаптары бузулуп жатканы тууралуу видео кайрылуу түшкөн.
Бул маалыматтын негизинде Мамлекеттик архитектура-курулуш контролдоо департаменти текшерүү жүргүзүп, объектте “Курулуштагы эмгекти коргоо жана коопсуздук” талаптары сакталбаганын аныктаган.
Жыйынтыгында “Бест Хаус гранд” ЖЧКсына протокол түзүлүп, 200 миң сом айып пул салынды.
Министрлик курулуш компанияларын мыйзам талаптарын так сактоого чакырып, коопсуздук эрежелерине өзгөчө көңүл буруу керектигин эскертти. Ошондой эле жарандар мыйзам бузууларды байкаса, фото же видео далилдерди ишеним телефону аркылуу жөнөтө ала турганы белгиленди.
