Бишкек шаарында таяныч-кыймыл аппаратынын мүмкүнчүлүгү чектелген спортчулар арасында шахмат боюнча Азиянын биринчи чемпионатынын жабылыш аземи болуп өттү. Иш-чараны эл аралык кыймыл мүмкүнчүлүгү чектелген адамдардын шахмат ассоциациясы (IPCA) уюштурду.
Жабылыш аземине Бишкек шаарынын мэри Айбек Джунушалиев, Олимпиадалык спорт түрлөрү боюнча дирекциянын директору Мелис Тобокелов, ошондой эле коомдук ишмер Ассоль Молдокматова катышты.
Шаар башчысы чемпионатты уюштурууга салым кошкондорго ыраазычылык билдирип, мындай иш-чаралар таланттуу спортчуларды аныктоого, колдоого жана эл аралык мелдештерге даярдоого өбөлгө түзөрүн белгиледи.
Чемпионат FIDE, ACF жана IPCA уюмдарынын колдоосу менен өткөрүлдү. Ага Кыргызстан, Казакстан, Өзбекстан жана Россиядан 25ке жакын шахматчы катышты.
Мелдештер классикалык шахмат, рапид жана блиц түрлөрү боюнча швейцар системасы менен 9 турда өттү.
Иш-чаранын негизги максаты — мүмкүнчүлүгү чектелген адамдар арасында интеллектуалдык спортту өнүктүрүү, алардын коомдук турмушка катышуусун кеңейтүү жана эл аралык кызматташтыкты бекемдөө болуп саналат.
