Украинанын президенти Владимир Зеленский Абу-Даби шаарында Бириккен Араб Эмираттарынын президенти шейх Мухаммед бин Заид аль-Нахайян менен жолугушту.
Сүйлөшүүнүн жүрүшүндө тараптар аймактагы коопсуздук маселелерин, анын ичинде Ормуз кысыгына байланышкан кырдаалды талкуулашты. Зеленский Украина Эмираттар менен коргонуу тармагында узак мөөнөттүү кызматташууга даяр экенин белгиледи.
Өз кезегинде БАЭ лидери Украинага көрсөтүлгөн эксперттик колдоо жана өнөктөштөр менен бөлүшүлгөн тажрыйба үчүн ыраазычылык билдирди.
Мындан тышкары, жолугушууда инвестиция, биргелешкен өндүрүш, ошондой эле маанилүү жана социалдык инфраструктураны коргоо системаларын жаңылоо маселелери каралды.
Жыйынтыгында тараптар коопсуздук жана коргонуу багытындагы кызматташууну кеңейтүү боюнча макулдашып, учурда тиешелүү келишимдердин чоо-жайы такталууда.
